راحت قلب و جگر گرمئ بازار سے ہے

راحت قلب و جگر گرمئ بازار سے ہے

آج کل گھر کا تصور در و دیوار سے ہے

زندگی ہی نے نہیں جھٹکا ہے دامن اپنا

چارہ گر موت بھی روٹھی ہوئی بیمار سے ہے

جامۂ عنصر ہستی کو کہیں پھینک آؤں

زندگانی کی مصیبت تو انہی چار سے ہے

مرہم تلخیٔ گفتار کہاں سے لاؤں

زخم گہرا ترے الفاظ کا تلوار سے ہے

کار وحشت کو سرانجام یہی تو دے گا

کام ابھی ہم کو بہت کچھ دل بے کار سے ہے

چھوڑ دیتا ہے جہاں سانس بھی انسان کا ساتھ

اب سفر زیست کا اس منزل دشوار سے ہے

تیرا انداز سخن خضرؔ جدا ہے سب سے

تیری پہچان ہی ظالم ترے اشعار سے ہے