rahat-e-qalb-o-jigar garmi-e-bazar se hai

rāhat-e-qalb-o-jigar garmī-e-bāzār se hai

āj-kal ghar kā tasavvur dar-o-dīvār se hai

zindagī hī ne nahīñ jhaTkā hai dāman apnā

chārāgar maut bhī rūThī huī bīmār se hai

jāma-e-unsur-e-hastī ko kahīñ pheñk aa.uuñ

zindagānī kī musībat to inhī chaar se hai

marham-e-talḳhī-e-guftār kahāñ se lā.ūñ

zaḳhm gahrā tire alfāz kā talvār se hai

kār-e-vahshat ko sar-anjām yahī to degā

kaam abhī ham ko bahut kuchh dil-e-be-kār se hai

chhoḌ detā hai jahāñ saañs bhī insān kā saath

ab safar ziist kā us manzil-e-dushvār se hai

terā andāz-e-suḳhan 'ḳhizr' judā hai sab se

terī pahchān hī zālim tire ash.ār se hai

rahat-e-qalb-o-jigar garmi-e-bazar se hai

aaj-kal ghar ka tasawwur dar-o-diwar se hai

zindagi hi ne nahin jhaTka hai daman apna

chaaragar maut bhi ruThi hui bimar se hai

jama-e-unsur-e-hasti ko kahin phenk aaun

zindagani ki musibat to inhi chaar se hai

marham-e-talKHi-e-guftar kahan se laun

zaKHm gahra tere alfaz ka talwar se hai

kar-e-wahshat ko sar-anjam yahi to dega

kaam abhi hum ko bahut kuchh dil-e-be-kar se hai

chhoD deta hai jahan sans bhi insan ka sath

ab safar zist ka us manzil-e-dushwar se hai

tera andaz-e-suKHan 'KHizr' juda hai sab se

teri pahchan hi zalim tere ashaar se hai