rahat ke sath sath musibat bhi chahiye

rāhat ke saath saath musībat bhī chāhiye

insāñ ko ġham ke saath masarrat bhī chāhiye

raushan karūñgā kaale gharoñ ko maiñ ek din

lekin zarā sā vaqt bhī fursat bhī chāhiye

phirtā huuñ le ke dāman-e-sad-chāk shahr meñ

bad-nāmiyāñ milī haiñ to shohrat bhī chāhiye

kaliyoñ ko gulsitāñ meñ masalnā bajā nahīñ

kāñToñ ko rauñd dene kī 'ādat bhī chāhiye

jhūTī tasalliyoñ kā maiñ qaa.il nahīñ zarā

siine meñ dard dil meñ mohabbat bhī chāhiye

maiñ jāntā huuñ sone ke sikke haiñ tere paas

kuchh tere dil meñ dard kī daulat bhī chāhiye

kab tak suneñge ham gul-o-bulbul kī dāstāñ

'afsar' shu'ūr-o-fikr meñ jiddat bhī chāhiye

rahat ke sath sath musibat bhi chahiye

insan ko gham ke sath masarrat bhi chahiye

raushan karunga kale gharon ko main ek din

lekin zara sa waqt bhi fursat bhi chahiye

phirta hun le ke daman-e-sad-chaak shahr mein

bad-namiyan mili hain to shohrat bhi chahiye

kaliyon ko gulsitan mein masalna baja nahin

kanTon ko raund dene ki 'adat bhi chahiye

jhuTi tasalliyon ka main qail nahin zara

sine mein dard dil mein mohabbat bhi chahiye

main jaanta hun sone ke sikke hain tere pas

kuchh tere dil mein dard ki daulat bhi chahiye

kab tak sunenge hum gul-o-bulbul ki dastan

'afsar' shu'ur-o-fikr mein jiddat bhi chahiye