راحت کے ساتھ ساتھ مصیبت بھی چاہئے

راحت کے ساتھ ساتھ مصیبت بھی چاہئے

انساں کو غم کے ساتھ مسرت بھی چاہئے

روشن کروں گا کالے گھروں کو میں ایک دن

لیکن ذرا سا وقت بھی فرصت بھی چاہئے

پھرتا ہوں لے کے دامن صد چاک شہر میں

بد نامیاں ملی ہیں تو شہرت بھی چاہئے

کلیوں کو گلستاں میں مسلنا بجا نہیں

کانٹوں کو روند دینے کی عادت بھی چاہئے

جھوٹی تسلیوں کا میں قائل نہیں ذرا

سینے میں درد دل میں محبت بھی چاہئے

میں جانتا ہوں سونے کے سکے ہیں تیرے پاس

کچھ تیرے دل میں درد کی دولت بھی چاہئے

کب تک سنیں گے ہم گل و بلبل کی داستاں

افسرؔ شعور و فکر میں جدت بھی چاہئے