rahat mili sukun mila aagahi mili

rāhat milī sukūn milā āgahī milī

vo kyā mile ki ham ko na.ī zindagī milī

dil kā bujhā charāġh achānak bhaḌak uThā

ik chashm-e-pur-ḳhulūs meñ vo sho.alagī milī

saath un ke zindagī kā safar is tarah kaTā

rāhoñ meñ har qadam pe ḳhushī nāchtī milī

jis meñ rachā huā thā mirā rang-e-ārzū

un ke laboñ pe giit kī vo pankhuḌī milī

shāyad mirī nigāh-e-parastish kā sehr thā

mūrat vo marmarīñ sī mujhe boltī milī

ik māh-vash kā nuur rahā ruuh par muhīt

har raat zindagī kī mujhe chāñdnī milī

badnām ishq meñ na hue ġhair kī tarah

izzat-fazā hayāt hameñ ishq kī milī

dil-bastagī-e-bazm meñ talve jhulas ga.e

sho.aloñ pe raqs kartī hameñ zindagī milī

ik mehrbāñ nazar kī adā-e-latīf se

āvārgī-e-‘rāz’ ko shā.istagī milī

rahat mili sukun mila aagahi mili

wo kya mile ki hum ko nai zindagi mili

dil ka bujha charagh achanak bhaDak uTha

ek chashm-e-pur-KHulus mein wo shoalagi mili

sath un ke zindagi ka safar is tarah kaTa

rahon mein har qadam pe KHushi nachti mili

jis mein racha hua tha mera rang-e-arzu

un ke labon pe git ki wo pankhuDi mili

shayad meri nigah-e-parastish ka sehr tha

murat wo marmarin si mujhe bolti mili

ek mah-wash ka nur raha ruh par muhit

har raat zindagi ki mujhe chandni mili

badnam ishq mein na hue ghair ki tarah

izzat-faza hayat hamein ishq ki mili

dil-bastagi-e-bazm mein talwe jhulas gae

shoalon pe raqs karti hamein zindagi mili

ek mehrban nazar ki ada-e-latif se

aawargi-e-‘raaz’ ko shaistagi mili