rahbar kaun mila kis ka sahaara nikla

rāhbar kaun milā kis kā sahārā niklā

jis taraf bhī ga.e ham shahr tumhārā niklā

Duub jaanā hī muqaddar thā kareñ kis se gila

ham bhañvar meñ rahe sāhil na kinārā niklā

raakh ke Dher meñ gum ho ga.e kitne yaaro

Tapkī shabnam na kahīñ koī sharāra niklā

ham musalsal rahe gardish kī tahoñ ke andar

is jahāñ meñ na koī dost hamārā niklā

kitne aivān mohabbat ke sajā.e phir bhī

makḌiyoñ kā mire alfāz meñ jaalā niklā

kaise suljhā.eñ bhalā mas.ala-e-chāragarī

jis ko bhī dekhā vahī dard kā maarā niklā

jaan dī ham ne 'zafar' sirf taqaddus ke liye

phir bhī tārīḳh meñ kab naam hamārā niklā

rahbar kaun mila kis ka sahaara nikla

jis taraf bhi gae hum shahr tumhaara nikla

Dub jaana hi muqaddar tha karen kis se gila

hum bhanwar mein rahe sahil na kinara nikla

rakh ke Dher mein gum ho gae kitne yaro

Tapki shabnam na kahin koi sharara nikla

hum musalsal rahe gardish ki tahon ke andar

is jahan mein na koi dost hamara nikla

kitne aiwan mohabbat ke sajae phir bhi

makDiyon ka mere alfaz mein jala nikla

kaise suljhaen bhala masala-e-chaaragari

jis ko bhi dekha wahi dard ka mara nikla

jaan di hum ne 'zafar' sirf taqaddus ke liye

phir bhi tariKH mein kab nam hamara nikla