ranai mein Dubi hui pai teri aawaz

ra.anā.ī meñ Duubī huī paa.ī tirī āvāz

kyā ḳhuub ḳhudā ne hai banā.ī tirī āvāz

maḳhmūr hai har taar mire sāz-e-nafas kā

kānoñ meñ mire jab se hai aa.ī tirī āvāz

ye merā junūñ hai ki hai āvāz kā jaadū

āñkhoñ se bhī detī hai dikhā.ī tirī āvāz

mastī bhare lahje meñ jahāñ tū huā goyā

gahrā.ī meñ jaañ kī utar aa.ī tirī āvāz

koyal kī ye shīrīñ sadā sauġhāt hai terī

bulbul ne bhī tujh se hai churā.ī tirī āvāz

le de ke faqat kaan pe mauqūf nahīñ hai

kartī hai tah-e-dil meñ rasā.ī tirī āvāz

kartā hai shab-o-roz 'nadīm' itnī duā.eñ

tujh se na kahīñ māñge judā.ī tirī āvāz

ranai mein Dubi hui pai teri aawaz

kya KHub KHuda ne hai banai teri aawaz

maKHmur hai har tar mere saz-e-nafas ka

kanon mein mere jab se hai aai teri aawaz

ye mera junun hai ki hai aawaz ka jadu

aankhon se bhi deti hai dikhai teri aawaz

masti bhare lahje mein jahan tu hua goya

gahrai mein jaan ki utar aai teri aawaz

koyal ki ye shirin sada saughat hai teri

bulbul ne bhi tujh se hai churai teri aawaz

le de ke faqat kan pe mauquf nahin hai

karti hai tah-e-dil mein rasai teri aawaz

karta hai shab-o-roz 'nadim' itni duaen

tujh se na kahin mange judai teri aawaz