rani bhi baadshah bhi sare ghulam chup

raanī bhī bādshāh bhī saare ġhulām chup

kirdār haiñ kahānī ke sab aaj shaam chup

jāhil adū se bātoñ se badla na le tū dost

is se baḌā nahīñ hai koī intiqām chup

be-nām ḳhvāhishoñ ne banāyā use halīf

paañv meñ sar-nigūñ thī kahīñ nā-tamām chup

tanhā.ī ho to bolnā sab se baḌā hai jurm

ho sāmne habīb to phir hai harām chup

ziine utar ke aa.e haiñ vo aise rū-ba-rū

dāñtoñ meñ uñgliyāñ haiñ sabhī ḳhush-kalām chup

dekho vo ālī-jāh haiñ ālī-maqām haiñ

hadd-e-adab hai rahiye ba-sad-ehtirām chup

dukh dard kī bunat se kahānī huī hai ḳhatm

'tāhir' na un kā bhūle se bhī le tū naam chup

rani bhi baadshah bhi sare ghulam chup

kirdar hain kahani ke sab aaj sham chup

jahil adu se baaton se badla na le tu dost

is se baDa nahin hai koi intiqam chup

be-nam KHwahishon ne banaya use halif

panw mein sar-nigun thi kahin na-tamam chup

tanhai ho to bolna sab se baDa hai jurm

ho samne habib to phir hai haram chup

zine utar ke aae hain wo aise ru-ba-ru

danton mein ungliyan hain sabhi KHush-kalam chup

dekho wo aali-jah hain aali-maqam hain

hadd-e-adab hai rahiye ba-sad-ehtiram chup

dukh dard ki bunat se kahani hui hai KHatm

'tahir' na un ka bhule se bhi le tu nam chup