ras aai na koi rahguzar waqt laga

raas aa.ī na koī rāhguzar vaqt lagā

haa.e bekār gayā merā safar vaqt lagā

zaḳhm ghulte haiñ yahāñ vaqt kī guzarāñ se gar

raas aa.egī ye tanhā.ī agar vaqt lagā

maiñ bharī duniyā meñ kahtā thā tujhe apnā kabhī

khul ga.ī ramz-e-shanāsā.ī magar vaqt lagā

dil kī tanhā.ī kisī taur bhī jaane kī nahīñ

vaise kā vaisā hai ye zaḳhm-e-jigar vaqt lagā

ik jamā.at ne mire buġhz meñ kyā kyā na kiyā

kab mirā zarf huā zer-o-zabar vaqt lagā

us ne kun kah ke banā Daalī ye duniyā saarī

ham se ban paayā na ik adnā sā ghar vaqt lagā

ras aai na koi rahguzar waqt laga

hae bekar gaya mera safar waqt laga

zaKHm ghulte hain yahan waqt ki guzaran se gar

ras aaegi ye tanhai agar waqt laga

main bhari duniya mein kahta tha tujhe apna kabhi

khul gai ramz-e-shanasai magar waqt laga

dil ki tanhai kisi taur bhi jaane ki nahin

waise ka waisa hai ye zaKHm-e-jigar waqt laga

ek jamaat ne mere bughz mein kya kya na kiya

kab mera zarf hua zer-o-zabar waqt laga

us ne kun kah ke bana Dali ye duniya sari

hum se ban paya na ek adna sa ghar waqt laga