ras aati hai na darweshi na sultani mujhe

raas aatī hai na darveshī na sultānī mujhe

apnī dānā.ī bhī ab lagtī hai nādānī mujhe

zindagī ik ḳhitta-e-ḳhvāb-o-ḳhayāl-e-ḳhām hai

parda uThtā hai nazar aatī hai hairānī mujhe

ho ga.ī hai kam mujhe ab fursat-e-nazzārgī

har-taraf rahtī hai jalvoñ kī farāvānī mujhe

kaun rakhtā hai mujhe āvāra-e-kū-e-malāl

kar diyā hai aish-e-roz-o-shab kā zindānī mujhe

kar diyā hai kis ne duniyā meñ mujhe ḳhvār-o-ḳharāb

sauñp dī hai kis ne is dil kī nigahbānī mujhe

ab koī mushkil mujhe mushkil nazar aatī nahīñ

ho ga.ī hai ab to āsānī bhī āsānī mujhe

kis qadar apnī suhūlat meñ suhūlat thī mujhe

ho ga.ī kitnī girāñ apnī girāñ-jānī mujhe

jab se utrā hai 'ziyā' āñkhoñ se malbūs-e-nazar

ḳhush-libāsī bhī nazar aatī hai uryānī mujhe

ras aati hai na darweshi na sultani mujhe

apni danai bhi ab lagti hai nadani mujhe

zindagi ek KHitta-e-KHwab-o-KHayal-e-KHam hai

parda uThta hai nazar aati hai hairani mujhe

ho gai hai kam mujhe ab fursat-e-nazzargi

har-taraf rahti hai jalwon ki farawani mujhe

kaun rakhta hai mujhe aawara-e-ku-e-malal

kar diya hai aish-e-roz-o-shab ka zindani mujhe

kar diya hai kis ne duniya mein mujhe KHwar-o-KHarab

saunp di hai kis ne is dil ki nigahbani mujhe

ab koi mushkil mujhe mushkil nazar aati nahin

ho gai hai ab to aasani bhi aasani mujhe

kis qadar apni suhulat mein suhulat thi mujhe

ho gai kitni giran apni giran-jaani mujhe

jab se utra hai 'ziya' aankhon se malbus-e-nazar

KHush-libasi bhi nazar aati hai uryani mujhe