راستہ ہے محال جیسا کچھ

راستہ ہے محال جیسا کچھ

حوصلہ ہے مجال جیسا کچھ

دل پہ اکثر گزرتا رہتا ہے

گردش ماہ و سال جیسا کچھ

عشق کیا ہے پتہ نہیں پر ہے

ہجر جیسا وصال جیسا کچھ

اس کے بارے میں آتا رہتا ہے

دل میں اکثر خیال جیسا کچھ

وصل میں اس کے لب پہ جانے کیا

تھرتھرا کے سوال جیسا کچھ

ذہن و دل میں ہے ایک مدت سے

درد جیسا ملال جیسا کچھ

پاؤں اٹھتے نہیں اٹھائے بھی

کچھ ہے پاؤں میں جال جیسا کچھ

اس طرف ہی چلی ہے کیوں دنیا

جس طرف ہے زوال جیسا کچھ

ہے گرفتار جزر و مد ہستی

کچھ تو ہو اعتدال جیسا کچھ

مجھ کو تسلیم ہے خدا میرے

تو نے بخشا ہے حال جیسا کچھ