raston mein Dher ho kar phul se paikar gire

rāstoñ meñ Dher ho kar phuul se paikar gire

barg kitne āñdhiyoñ ke paañv meñ aa kar gire

ai junūñ kī sā.ato aamad bahāroñ kī huī

dekhnā vo shāḳhchoñ se titliyoñ ke par gire

tum na sun paa.e sadā dil TūTne kī aur yahāñ

shor vo uTThā zamīñ par jis tarah ambar gire

kaun jaane kitnī yādoñ se huā dil zaḳhm zaḳhm

chāñdnī barsī ki merī ruuh par ḳhanjar gire

muntazir huuñ ġham ke is tūfān-e-abr-o-bād meñ

kab ghaTā kā shor kam ho kab havā thak kar gire

yuuñ huā huuñ jazb 'ja.afar' vaqt ke tūfān meñ

tah maiñ gahre pāniyoñ kī jis tarah kankar gire

raston mein Dher ho kar phul se paikar gire

barg kitne aandhiyon ke panw mein aa kar gire

ai junun ki saato aamad bahaaron ki hui

dekhna wo shaKHchon se titliyon ke par gire

tum na sun pae sada dil TuTne ki aur yahan

shor wo uTTha zamin par jis tarah ambar gire

kaun jaane kitni yaadon se hua dil zaKHm zaKHm

chandni barsi ki meri ruh par KHanjar gire

muntazir hun gham ke is tufan-e-abr-o-baad mein

kab ghaTa ka shor kam ho kab hawa thak kar gire

yun hua hun jazb 'jafar' waqt ke tufan mein

tah main gahre paniyon ki jis tarah kankar gire