raat aai hai bachchon ko paDhane mein laga hun

raat aa.ī hai bachchoñ ko paḌhāne meñ lagā huuñ

ḳhud jo na banā un ko banāne meñ lagā huuñ

vo shaḳhs to rag rag meñ mirī guuñj rahā hai

barsoñ se galā jis kā dabāne meñ lagā huuñ

utrā huuñ diyā le ke nihāñ-ḳhāna-e-jāñ meñ

so.e so.e aaseb jagāne meñ lagā huuñ

patthar huuñ to shīshe se mujhe kaam paḌā hai

shīsha huuñ to patthar ke zamāne meñ lagā huuñ

fankār ba-zid hai ki lagā.egā numā.ish

maiñ huuñ ki har ik zaḳhm chhupāne meñ lagā huuñ

kuchh paḌhnā hai kuchh likhnā hai kuchh ronā hai shab ko

maiñ kaam sar-e-shām chukāne meñ lagā huuñ

aise meñ to ab sabr bhī mushkil huā 'akbar'

sab kahte haiñ maiñ us ko bhulāne meñ lagā huuñ

raat aai hai bachchon ko paDhane mein laga hun

KHud jo na bana un ko banane mein laga hun

wo shaKHs to rag rag mein meri gunj raha hai

barson se gala jis ka dabane mein laga hun

utra hun diya le ke nihan-KHana-e-jaan mein

soe soe aaseb jagane mein laga hun

patthar hun to shishe se mujhe kaam paDa hai

shisha hun to patthar ke zamane mein laga hun

fankar ba-zid hai ki lagaega numaish

main hun ki har ek zaKHm chhupane mein laga hun

kuchh paDhna hai kuchh likhna hai kuchh rona hai shab ko

main kaam sar-e-sham chukane mein laga hun

aise mein to ab sabr bhi mushkil hua 'akbar'

sab kahte hain main us ko bhulane mein laga hun