raat aankhon mein guzri sapne bhig gae

raat āñkhoñ meñ guzrī sapne bhiig ga.e

bārish se khiḌkī ke shīshe bhiig ga.e

bārish kī bochhāḌ to andar tak aa.ī

ḳhushk tanoñ ke sab andāze bhiig ga.e

bhiig ga.e sab apnī apnī yādoñ meñ

kuchh rote kuchh hañste hañste bhiig ga.e

bhiig ga.e sab ḳhat rakkhe almārī meñ

aur un meñ sab likkhe va.ade bhiig ga.e

dekh diye kī lau tū ne to dekhe haiñ

kitnī āñkheñ kitne takiye bhiig ga.e

bādal ke hamrāh schōl se nikle the

ghar tak aate aate baste bhiig ga.e

uḌte panchhī terī manzil duur hai kyā

dekh musāfir tere kapḌe bhiig ga.e

raat sitāre āñgan aur udaas āñkheñ

terī bāteñ karte karte bhiig ga.e

bāhar aa kar dekh ye manzar shahzādī

ham terī dahlīz pe baiThe bhiig ga.e

jaane kaise mausam kī ye bārish thī

merī āñkheñ tere sapne bhiig ga.e

jis bastī meñ dhuup sā ruup chamaktā thā

us bastī ke saare raste bhiig ga.e

raat aankhon mein guzri sapne bhig gae

barish se khiDki ke shishe bhig gae

barish ki bochhaD to andar tak aai

KHushk tanon ke sab andaze bhig gae

bhig gae sab apni apni yaadon mein

kuchh rote kuchh hanste hanste bhig gae

bhig gae sab KHat rakkhe almari mein

aur un mein sab likkhe wade bhig gae

dekh diye ki lau tu ne to dekhe hain

kitni aankhen kitne takiye bhig gae

baadal ke hamrah school se nikle the

ghar tak aate aate baste bhig gae

uDte panchhi teri manzil dur hai kya

dekh musafir tere kapDe bhig gae

raat sitare aangan aur udas aankhen

teri baaten karte karte bhig gae

bahar aa kar dekh ye manzar shahzadi

hum teri dahliz pe baiThe bhig gae

jaane kaise mausam ki ye barish thi

meri aankhen tere sapne bhig gae

jis basti mein dhup sa rup chamakta tha

us basti ke sare raste bhig gae