raat aansu ko teri aankh mein dekha humne

raat aañsū ko tirī aañkh meñ dekhā ham ne

rakh diyā toḌ ke jaise koī taarā ham ne

gum-shuda jism mile halqa-e-bāzū jaage

shaam se oḌh liyā aaj saverā ham ne

ġham meñ ḳhush rahte haiñ har sāya-e-qurbat se duur

ab badal Daalā mizāj ahl-e-vafā kā ham ne

os meñ mahkī huī raat ke poñchhe aañsū

sub.h ko de diyā hañstā huā chehrā ham ne

ḳhatm ḳhush-fahmi-e-sairābī huī hoñToñ tak

aañkh se dekhā hai pyāsā koī dariyā ham ne

chakh liyā jazba-e-vārafta ne ik rañg-e-hayāt

kar liyā apne lab-e-sāda ko jhūTā ham ne

raat aansu ko teri aankh mein dekha hum ne

rakh diya toD ke jaise koi tara hum ne

gum-shuda jism mile halqa-e-bazu jage

sham se oDh liya aaj sawera hum ne

gham mein KHush rahte hain har saya-e-qurbat se dur

ab badal Dala mizaj ahl-e-wafa ka hum ne

os mein mahki hui raat ke ponchhe aansu

subh ko de diya hansta hua chehra hum ne

KHatm KHush-fahmi-e-sairabi hui honTon tak

aankh se dekha hai pyasa koi dariya hum ne

chakh liya jazba-e-warafta ne ek rang-e-hayat

kar liya apne lab-e-sada ko jhuTa hum ne