raat be-KHwabiyon ka safar tere bin

raat be-ḳhvābiyoñ kā safar tere bin

din hai bechainiyoñ kā nagar tere bin

qurbateñ fāsloñ meñ badaltī rahīñ

bad-gumānī har ik moḌ par tere bin

chāñdnī meñ sahar, husn, ThanDak na nuur

aib thā us kā har ik hunar tere bin

ḳhvāb ḳhāna-ba-doshoñ se phirte rahe

niiñd bhī ho ga.ī dar-ba-dar tere bin

mere bāloñ meñ chāñdī pirote rahe

tez-raftār shām-o-sahar tere bin

phir tire lauTne kī ḳhabar aa.ī thī

ham nahīñ the kabhī be-ḳhabar tere bin

āñkheñ jaltī haiñ merī diyoñ kī jagah

shaam se ghar kī dahlīz par tere bin

ab na sāvan, na jhūle, na sakhiyāñ, na giit

jaise ḳhāmosh saarā nagar tere bin

chāñdnī DhūñDhtī thī tire naqsh-e-pā

raat, tāroñ kī dahlīz par tere bin

raat be-KHwabiyon ka safar tere bin

din hai bechainiyon ka nagar tere bin

qurbaten faslon mein badalti rahin

bad-gumani har ek moD par tere bin

chandni mein sahar, husn, ThanDak na nur

aib tha us ka har ek hunar tere bin

KHwab KHana-ba-doshon se phirte rahe

nind bhi ho gai dar-ba-dar tere bin

mere baalon mein chandi pirote rahe

tez-raftar sham-o-sahar tere bin

phir tere lauTne ki KHabar aai thi

hum nahin the kabhi be-KHabar tere bin

aankhen jalti hain meri diyon ki jagah

sham se ghar ki dahliz par tere bin

ab na sawan, na jhule, na sakhiyan, na git

jaise KHamosh sara nagar tere bin

chandni DhunDhti thi tere naqsh-e-pa

raat, taron ki dahliz par tere bin