رات بھر آتی رہی اک درد پروردہ صدا

رات بھر آتی رہی اک درد پروردہ صدا

ڈھونڈھنے نکلے تو سارے دشت میں کوئی نہ تھا

جب کبھی میں نے کوئی تصویر اتاری ذہن سے

دہر میں اس شکل کا کوئی نہ کوئی مل گیا

حادثوں کے کارواں گھر میں بلائے بار بار

صرف اک جملے کی خاطر کیا ہوا کیسے ہوا

ڈھونڈھتا پھرتا تھا جس کو دشت میں بازار میں

کل مجھے وہ آئنے میں اتفاقاً مل گیا

ایک لمحہ راہ میں ایسا بھی آ پہنچا تھا جب

میں بھی کوئی اور تھا اور وہ بھی کوئی اور تھا

ایک سایہ چھانتا رہتا ہے خاک اس شہر میں

چاندنی کی لوریاں دیتی ہے جب ٹھنڈی ہوا

جانے کیوں لوگوں نے خاموشی کی چادر اوڑھ لی

جب تمہارا تذکرہ عابدؔ ذرا آنے لگا