رات بھر فصل بہار آنے کا ساماں ہونا

رات بھر فصل بہار آنے کا ساماں ہونا

صبح پو پھٹتے ہی ہاتھوں میں گریباں ہونا

تم مرا حال نہ دیکھو کہ ملیں گی نظریں

مجھ سے دیکھا نہیں جائے گا پشیماں ہونا

ہجر اور جی کے بہل جانے کی کوشش توبہ

مشکلیں اور بغیر آپ کے آساں ہونا

میری کشتی کو بہرحال ہے موجوں سے لگاؤ

ہو جو ہر موج کو ہے شامل طوفاں ہونا

چھیڑ دی ظلم کی توجیہہ سلامت رہیے

شرم آئی بھی تو آیا نہ پشیماں ہونا

اپنے ہی دل میں کھلے پھول سے کہتا ہے رضاؔ

تو جہاں ہے اسے راس آئے گلستاں ہونا