raat bhar jine se kya sham-e-shabistan ki tarah

raat bhar jiine se kyā sham-e-shabistāñ kī tarah

ek lamha hai bahut sho.ala-e-raqsāñ kī tarah

dil ke zaḳhmoñ pe bhī phūloñ kā gumāñ hotā hai

yaad aa.ī hai tirī mauj-e-bahārāñ kī tarah

kyuuñ ho ḳhāmosh rafīqān-e-chaman kuchh to kaho

sub.h-e-gulshan bhī na guzre shab-e-zindāñ kī tarah

lazzat-e-dard ko arbāb-e-havas kyā jāneñ

lazzat-e-dard ki arzāñ nahīñ darmāñ kī tarah

yūrish-e-dard ne pindār-e-vafā toḌ diyā

ham bhī nādim haiñ bahut husn-e-pashemāñ kī tarah

yaad rakhegā sulagtā huā māhaul hameñ

ḳhārzāroñ meñ rahe ham gul-e-ḳhandāñ kī tarah

tab-e-ḳhuddār pe ik turfa sitam hai 'mohsin'

un kā andāz-e-karam ġhair ke ehsāñ kī tarah

raat bhar jine se kya sham-e-shabistan ki tarah

ek lamha hai bahut shoala-e-raqsan ki tarah

dil ke zaKHmon pe bhi phulon ka guman hota hai

yaad aai hai teri mauj-e-bahaaran ki tarah

kyun ho KHamosh rafiqan-e-chaman kuchh to kaho

subh-e-gulshan bhi na guzre shab-e-zindan ki tarah

lazzat-e-dard ko arbab-e-hawas kya jaanen

lazzat-e-dard ki arzan nahin darman ki tarah

yurish-e-dard ne pindar-e-wafa toD diya

hum bhi nadim hain bahut husn-e-pasheman ki tarah

yaad rakhega sulagta hua mahaul hamein

KHarzaron mein rahe hum gul-e-KHandan ki tarah

tab-e-KHuddar pe ek turfa sitam hai 'mohsin'

un ka andaz-e-karam ghair ke ehsan ki tarah