raat bhar shoala-e-jaan KHub baDhaya jae

raat bhar sho.ala-e-jāñ ḳhuub baḌhāyā jaa.e

phir dam-e-sub.h hī ḳhvāboñ ko jalāyā jaa.e

jab qazā likh hī chukī silsila-e-rāh-e-fanā

kyuuñ na phir vaqt-e-ajal jald bulāyā jaa.e

sā.at-e-shām-e-ġham-e-hijr kā sannāTā hai

shahr-e-auhām ko sapnoñ se sajāyā jaa.e

jiddat-e-vahshat-e-sahrā ke liye lāzim hai

dasht ke beach ab ik shahr basāyā jaa.e

bār-e-jāñ laad liyā sar pe aur ab sochte haiñ

itnā kaafī hai ki kuchh bojh baḌhāyā jaa.e

kurra-e-dīd ko daurān-e-taqāzā-e-nazar

kashish-e-saql-e-nazāra se chhuḌāyā jaa.e

shorish-e-ḳhāk-o-lahū dekh ke us ne sochā

kyuuñ na ab ashk se insān banāyā jaa.e

tah se le aa.eñ use ham magar itnā to khule

kitnī gahrā.ī meñ jā kar use paayā jaa.e

raat bhar shoala-e-jaan KHub baDhaya jae

phir dam-e-subh hi KHwabon ko jalaya jae

jab qaza likh hi chuki silsila-e-rah-e-fana

kyun na phir waqt-e-ajal jald bulaya jae

saat-e-sham-e-gham-e-hijr ka sannaTa hai

shahr-e-auham ko sapnon se sajaya jae

jiddat-e-wahshat-e-sahra ke liye lazim hai

dasht ke beach ab ek shahr basaya jae

bar-e-jaan lad liya sar pe aur ab sochte hain

itna kafi hai ki kuchh bojh baDhaya jae

kurra-e-did ko dauran-e-taqaza-e-nazar

kashish-e-saql-e-nazara se chhuDaya jae

shorish-e-KHak-o-lahu dekh ke us ne socha

kyun na ab ashk se insan banaya jae

tah se le aaen use hum magar itna to khule

kitni gahrai mein ja kar use paya jae