raat bhi baqi hai sahba bhi shisha bhi paimana bhi

raat bhī baaqī hai sahbā bhī shīsha bhī paimāna bhī

aise meñ kyuuñ chheḌ na deñ ham zikr-e-ġham-e-jānāna bhī

bastī meñ har ik rahtā hai apnā bhī begāna bhī

haal kisī ne pūchhā dil kā dard kisī ne jaanā bhī

haa.e tajāhul aaj hamīñ se pūchh rahe haiñ ahl-e-ḳhirad

sunte haiñ is shahr meñ rahtā hai koī dīvāna bhī

āḳhir saf tak aate aate har paimāna chhalkā hai

lekin ham tak aate aate TuuT gayā paimāna bhī

jis se dil kā zaḳhm harā ho aisā koī zikr na chheḌ

jis meñ us kā naam na aa.e aisā ik afsāna bhī

shahr kī rañgā-rañg nigāro dil vāloñ kī qadr karo

mahfil meñ donoñ jalte haiñ sham.a bhī parvāna bhī

raat bhi baqi hai sahba bhi shisha bhi paimana bhi

aise mein kyun chheD na den hum zikr-e-gham-e-jaanana bhi

basti mein har ek rahta hai apna bhi begana bhi

haal kisi ne puchha dil ka dard kisi ne jaana bhi

hae tajahul aaj hamin se puchh rahe hain ahl-e-KHirad

sunte hain is shahr mein rahta hai koi diwana bhi

aaKHir saf tak aate aate har paimana chhalka hai

lekin hum tak aate aate TuT gaya paimana bhi

jis se dil ka zaKHm hara ho aisa koi zikr na chheD

jis mein us ka nam na aae aisa ek afsana bhi

shahr ki ranga-rang nigaro dil walon ki qadr karo

mahfil mein donon jalte hain shama bhi parwana bhi