raat bhi humne ro-ro kaTi din bhi so ke KHarab kiya

raat bhī ham ne ro-ro kaaTī din bhī so ke ḳharāb kiyā

khulne vaalī āñkhoñ ko bhī amdan mahv-e-ḳhvāb kiyā

ek hī roTī ko dho dho kar piite rahe ham shām-o-sahar

saarī umr meñ shāyad ham ne ek hī kār-e-savāb kiyā

rizq to hai maqsūm hamārā us ko duā kī hājat kyuuñ

Dhāñk ke chehra dast-e-duā se ham ne ḳhud se ḳhitāb kiyā

us kī nazar se tiir jo niklā Thiik nishāne par baiThā

ghāyal aahū ban kar ham ne ban ban ko shādāb kiyā

ashk bahā dene ke hunar meñ saanī us kā koī nahīñ

ik din hañste hañste us ne sab ko tah-e-sailāb kiyā

bachpan meñ dekhā thā ham ne maañ kā chehra yaad nahīñ

bū-alī-sīnā ban kar ham ne us ke ruḳh ko kitāb kiyā

raat bhi hum ne ro-ro kaTi din bhi so ke KHarab kiya

khulne wali aankhon ko bhi amdan mahw-e-KHwab kiya

ek hi roTi ko dho dho kar pite rahe hum sham-o-sahar

sari umr mein shayad hum ne ek hi kar-e-sawab kiya

rizq to hai maqsum hamara us ko dua ki hajat kyun

Dhank ke chehra dast-e-dua se hum ne KHud se KHitab kiya

us ki nazar se tir jo nikla Thik nishane par baiTha

ghayal aahu ban kar hum ne ban ban ko shadab kiya

ashk baha dene ke hunar mein sani us ka koi nahin

ek din hanste hanste us ne sab ko tah-e-sailab kiya

bachpan mein dekha tha hum ne man ka chehra yaad nahin

bu-ali-sina ban kar hum ne us ke ruKH ko kitab kiya