raat darpesh thi musafir ko

raat darpesh thī musāfir ko

niiñd kyoñ aa ga.ī musāfir ko

kyā nagar hai ye dil dikhā.ī de

har taraf aag sī musāfir ko

kal mohabbat-sarā-e-hairat meñ

ik milā ajnabī musāfir ko

yaad ke be-karāñ samundar meñ

ik lahr le chalī musāfir ko

yaad aa jaa.eñ ḳhvāb jaise log

jaane kab kis ghaḌī musāfir ko

saath le kar chalī ga.ī apne

ik parī sāñvlī musāfir ko

ik sadā thī ki har ghaḌī har pal

jo bulātī rahī musāfir ko

ik kahānī bahut purānī sī

yaad aatī rahī musāfir ko

chup lagī jab bhī bhūlne vaale

yaad aa.e kabhī musāfir ko

duur bas ik charāġh jaltā thā

vo ajab raat thī musāfir ko

maut kā dasht paar kar letā

umr kī qaid thī musāfir ko

le chalī hai na.ī rifāqat kī

ik na.ī raushnī musāfir ko

ek vahshat meñ le ke phirtī thī

rāt-bhar chāñdnī musāfir ko

der tak yaad kar ke rotī rahī

ek laḌkī kisī musāfir ko

khīñch laatī hai apnī miTTī tak

ḳhaak kī dostī musāfir ko

raat darpesh thi musafir ko

nind kyon aa gai musafir ko

kya nagar hai ye dil dikhai de

har taraf aag si musafir ko

kal mohabbat-sara-e-hairat mein

ek mila ajnabi musafir ko

yaad ke be-karan samundar mein

ek lahr le chali musafir ko

yaad aa jaen KHwab jaise log

jaane kab kis ghaDi musafir ko

sath le kar chali gai apne

ek pari sanwli musafir ko

ek sada thi ki har ghaDi har pal

jo bulati rahi musafir ko

ek kahani bahut purani si

yaad aati rahi musafir ko

chup lagi jab bhi bhulne wale

yaad aae kabhi musafir ko

dur bas ek charagh jalta tha

wo ajab raat thi musafir ko

maut ka dasht par kar leta

umr ki qaid thi musafir ko

le chali hai nai rifaqat ki

ek nai raushni musafir ko

ek wahshat mein le ke phirti thi

raat-bhar chandni musafir ko

der tak yaad kar ke roti rahi

ek laDki kisi musafir ko

khinch lati hai apni miTTi tak

KHak ki dosti musafir ko