raat Dhalte hi safiran-e-qamar aate hain

raat Dhalte hī safīrān-e-qamar aate haiñ

dil ke ā.īne meñ sau aks utar aate haiñ

sail-e-mahtāb se jab naqsh ubhar aate haiñ

os girtī hai to paiġhām-e-sharar aate haiñ

sā.at-e-dīd kā gulzār ho yā sāya-e-dār

aise kitne hī maqāmāt-e-safar aate haiñ

jāgtī āñkhoñ ne jin lamhoñ ko bikhrā dekhā

vahī lamhe mire ḳhvāboñ meñ nikhar aate haiñ

vaqt kī laash pe rone ko jigar hai kis kā

kis janāze ko liye ahl-e-nazar aate haiñ

raat kī baat hī kyā raat ga.ī baat ga.ī

raat ke ḳhvāb kahīñ din ko nazar aate haiñ

vādī-e-ġharb se paiham hai añdheroñ kā nuzūl

matla-e-sharq se paiġhām-e-sahar aate haiñ

raat Dhalte hi safiran-e-qamar aate hain

dil ke aaine mein sau aks utar aate hain

sail-e-mahtab se jab naqsh ubhar aate hain

os girti hai to paigham-e-sharar aate hain

saat-e-did ka gulzar ho ya saya-e-dar

aise kitne hi maqamat-e-safar aate hain

jagti aankhon ne jin lamhon ko bikhra dekha

wahi lamhe mere KHwabon mein nikhar aate hain

waqt ki lash pe rone ko jigar hai kis ka

kis janaze ko liye ahl-e-nazar aate hain

raat ki baat hi kya raat gai baat gai

raat ke KHwab kahin din ko nazar aate hain

wadi-e-gharb se paiham hai andheron ka nuzul

matla-e-sharq se paigham-e-sahar aate hain