raat-din josh-e-junun se kaam hona chahiye

rāt-din josh-e-junūñ se kaam honā chāhiye

ishq kī duniyā meñ apnā naam honā chāhiye

miT na jaa.e is jahāñ se ishq kā nām-o-nishāñ

kuchh to pās-e-hasrat-e-nākām honā chāhiye

gul-ruḳhoñ kī baat chhoḌo vo ḳhizāñ-dīda haiñ phuul

fasl-e-gul kā zikr sub.h-o-shām honā chāhiye

zindagī miTtī hai miT jaa.e adā-e-farz meñ

farz kī takmīl par anjām honā chāhiye

chal diye sab dost aur ahbāb tanhā chhoḌ kar

ab to majbūran ġharīq-e-jām honā chāhiye

chārāgar se ho nahīñ saktā ġharībī kā ilaaj

ab ġharīboñ hī kā qatl-e-ām honā chāhiye

ye bhī hai koī hukūmat jis kī lāThī us kī bhaiñs

jānte ho is kā jo anjām honā chāhiye

azm-o-himmat ho to ban jaatā hai 'āzam' har koī

shart ye hai aadmī ḳhush-kām honā chāhiye

raat-din josh-e-junun se kaam hona chahiye

ishq ki duniya mein apna nam hona chahiye

miT na jae is jahan se ishq ka nam-o-nishan

kuchh to pas-e-hasrat-e-nakaam hona chahiye

gul-ruKHon ki baat chhoDo wo KHizan-dida hain phul

fasl-e-gul ka zikr subh-o-sham hona chahiye

zindagi miTti hai miT jae ada-e-farz mein

farz ki takmil par anjam hona chahiye

chal diye sab dost aur ahbab tanha chhoD kar

ab to majburan ghariq-e-jam hona chahiye

chaaragar se ho nahin sakta gharibi ka ilaj

ab gharibon hi ka qatl-e-am hona chahiye

ye bhi hai koi hukumat jis ki laThi us ki bhains

jaante ho is ka jo anjam hona chahiye

azm-o-himmat ho to ban jata hai 'azam' har koi

shart ye hai aadmi KHush-kaam hona chahiye