raat-din lab pe na ho kyunki bayan-e-dehli

rāt-din lab pe na ho kyūñki bayān-e-dehlī

na makīñ ab vo rahe aur na makān-e-dehlī

ba.az maqtūl hue ba.azoñ ne phāñsī paa.ī

naam ko bhī na rahe pīr-o-javān-e-dehlī

shikva be-fā.eda kartā hai kisī kā hamdam

thā muqaddar meñ likhā yuuñ hī ziyān-e-dehlī

nahīñ bāzār-e-mohabbat meñ ḳharīdārī-e-dil

chhān Daalī hai har ik maiñ ne dukān-e-dehlī

na vo arbāb-e-tarab haiñ na vo haiñ ahl-e-nishāt

haañ nazar aate haiñ kuchh marsiya-ḳhvān-e-dehlī

ġhamza thā āfat-e-jāñ aur qayāmat-qāmat

ajab andāz ke the māh-ruḳhān-e-dehlī

ghis ke sandal kā lagānā jinheñ dard-e-sar thā

dil pe rakhte haiñ vo andoh-e-garān-e-dehlī

farsh-e-gul pe jo jhijakte the qadam rakhte hue

chalte kāñToñ pe haiñ vo nāzukanān-e-dehlī

ġhash pe ġhash aate agar dekhte hazrat-yūsuf

aise andāz ke the kaj-kulahān-e-dehlī

jhuk gayā charḳh ḳhajil ho ke qadam-bosī ko

us ne dekhī thī kabhī rif.at-shān-e-dehlī

hosh jaate rahe tharrā ga.ī nār-e-dozaḳh

pahuñchī aflāk pe jab āh-o-fuġhān-e-dehlī

ḳhaak jal-bhun ke to ho jā.egā charḳh-e-bad-bīñ

naala kar baiThe jo dil-soḳhtagān-e-dehlī

kuchh ajab naqsha yahāñ kā nazar aatā hai mujhe

kyūñki dillī pe kiyā jaa.e gumān-e-dehlī

aur shahroñ ke kareñ laakh takalluf lekin

nahīñ hone kī mayassar ye zabān-e-dehlī

haiñ na.e rañg na.e ruup jahāñ ke 'mehdī'

kaf-e-afsos hai aur lāla-ruḳhān-e-dehlī

raat-din lab pe na ho kyunki bayan-e-dehli

na makin ab wo rahe aur na makan-e-dehli

baz maqtul hue bazon ne phansi pai

nam ko bhi na rahe pir-o-jawan-e-dehli

shikwa be-faeda karta hai kisi ka hamdam

tha muqaddar mein likha yun hi ziyan-e-dehli

nahin bazar-e-mohabbat mein KHaridari-e-dil

chhan Dali hai har ek main ne dukan-e-dehli

na wo arbab-e-tarab hain na wo hain ahl-e-nishat

han nazar aate hain kuchh marsiya-KHwan-e-dehli

ghamza tha aafat-e-jaan aur qayamat-qamat

ajab andaz ke the mah-ruKHan-e-dehli

ghis ke sandal ka lagana jinhen dard-e-sar tha

dil pe rakhte hain wo andoh-e-garan-e-dehli

farsh-e-gul pe jo jhijakte the qadam rakhte hue

chalte kanTon pe hain wo nazukanan-e-dehli

ghash pe ghash aate agar dekhte hazrat-yusuf

aise andaz ke the kaj-kulahan-e-dehli

jhuk gaya charKH KHajil ho ke qadam-bosi ko

us ne dekhi thi kabhi rifat-shan-e-dehli

hosh jate rahe tharra gai nar-e-dozaKH

pahunchi aflak pe jab aah-o-fughan-e-dehli

KHak jal-bhun ke to ho jaega charKH-e-bad-bin

nala kar baiThe jo dil-soKHtagan-e-dehli

kuchh ajab naqsha yahan ka nazar aata hai mujhe

kyunki dilli pe kiya jae guman-e-dehli

aur shahron ke karen lakh takalluf lekin

nahin hone ki mayassar ye zaban-e-dehli

hain nae rang nae rup jahan ke 'mehdi'

kaf-e-afsos hai aur lala-ruKHan-e-dehli