رات گئے دن بھر کی باتوں سے جی کو بہلاتے ہیں

رات گئے دن بھر کی باتوں سے جی کو بہلاتے ہیں

نیند نہیں آتی ہے لیکن خواب تو پھر بھی آتے ہیں

کیسے باہر چھوڑ آتے ہیں بھری پڑی اک دنیا کو

کمرے میں اتنی تنہائی آپ کہاں سے لاتے ہیں

ایک زمانہ سمجھ رہا ہے چہرہ دیکھ کے دل کی بات

اک وہی بات سمجھ نہیں پاتا ہم جس کو سمجھاتے ہیں

ایک خموشی ہے جو آوازوں سے کم نہیں ہوتی ہے

ایک خلا ہے اپنے اندر جس کو بھرتے جاتے ہیں

وقت بڑا ہی ظالم ہے اک پل میں پھیل سا جاتا ہے

جانے کیسے اتنے دکھ اک لمحے میں آ جاتے ہیں