raat gae tak yunhi chalta rahta hun

raat ga.e tak yūñhī chaltā rahtā huuñ

vīrānī se bāteñ kartā rahtā huuñ

merī chhāñv meñ baiThne vaale soch zarā

saarā din maiñ dhuup meñ jaltā rahtā huuñ

aap to bilkul vaise mujh ko lagte ho

maiñ jis phuul ko ḳhvāb meñ dekhtā rahtā huuñ

jīvan mujh ko roz guzāre jaatā hai

maiñ huuñ ke bas ḳhaak uḌātā rahtā huuñ

maiñ ne ik din jhuuT kā luqma khāyā thā

ab maiñ aksar ḳhuun ugaltā rahtā huuñ

aksar mujh ko ḳhud pe ronā aatā hai

aksar yūñhī ḳhud pe hañstā rahtā huuñ

ek ajab sā peḌ bulātā hai mujh ko

aur maiñ us ke ḳhauf se Dartā rahtā huuñ

jab bhī maiñ ne tujh se milnā hotā hai

ḳhud se terī bāteñ kartā rahtā huuñ

raat gae tak yunhi chalta rahta hun

virani se baaten karta rahta hun

meri chhanw mein baiThne wale soch zara

sara din main dhup mein jalta rahta hun

aap to bilkul waise mujh ko lagte ho

main jis phul ko KHwab mein dekhta rahta hun

jiwan mujh ko roz guzare jata hai

main hun ke bas KHak uData rahta hun

main ne ek din jhuT ka luqma khaya tha

ab main aksar KHun ugalta rahta hun

aksar mujh ko KHud pe rona aata hai

aksar yunhi KHud pe hansta rahta hun

ek ajab sa peD bulata hai mujh ko

aur main us ke KHauf se Darta rahta hun

jab bhi main ne tujh se milna hota hai

KHud se teri baaten karta rahta hun