raat ke andheron ko raushni wo kya dega

raat ke añdheroñ ko raushnī vo kyā degā

ik diyā jalā.egā sau diye bujhā degā

muddateñ huī mujh se ghar chhuḌā diyā merā

kyā zamāna ab terā saath bhī chhuḌā degā

sab ke naqlī chehre haiñ sab kā ek aalam hai

koī is zamāne meñ kis ko aa.inā degā

maiñ abhī to mujrim huuñ aap apnā qātil huuñ

kaañp uThegā munsif bhī jab mujhe sazā degā

jo diyā ta.assub kā tum jalā ke aa.e ho

sub.h tak na jaane vo kitne ghar jalā degā

jāntā huuñ maiñ us kī sādgī-o-māsūmī

vo mirā kabūtar bhī haath se uḌā degā

us ke paas motī haiñ mere paas aañsū haiñ

maiñ abhī se kyā kah duuñ kaun kis ko kyā degā

us se ab jo pūchhūñgā us kā haal ai 'sāġhar'

koī sher merā hī vo mujhe sunā degā

raat ke andheron ko raushni wo kya dega

ek diya jalaega sau diye bujha dega

muddaten hui mujh se ghar chhuDa diya mera

kya zamana ab tera sath bhi chhuDa dega

sab ke naqli chehre hain sab ka ek aalam hai

koi is zamane mein kis ko aaina dega

main abhi to mujrim hun aap apna qatil hun

kanp uThega munsif bhi jab mujhe saza dega

jo diya tassub ka tum jala ke aae ho

subh tak na jaane wo kitne ghar jala dega

jaanta hun main us ki sadgi-o-masumi

wo mera kabutar bhi hath se uDa dega

us ke pas moti hain mere pas aansu hain

main abhi se kya kah dun kaun kis ko kya dega

us se ab jo puchhunga us ka haal ai 'saghar'

koi sher mera hi wo mujhe suna dega