raat ke sans ki mahkar se sarshaar hawa

raat ke saañs kī mahkār se sarshār havā

jāgte shahr sulā detī hai bedār havā

ho ke sairāb ḳham-e-shab se sar-e-dāman-e-gul

sūrat-e-abr baras jaatī hai mai-ḳhvār havā

jaane kis tarah ḳhalāoñ meñ dhanak bantī hai

chāñd kī rañg bharī jhiil ke us paar havā

tālib-e-mauj-e-sahar jaatī hai lahroñ pe savār

sāhil-e-shab se uThātī hai jo patvār havā

kitnī yādeñ haiñ ki jhoñkoñ kī tarah tairtī haiñ

chhoḌ aatī hai safar meñ jinheñ mañjdhār havā

sar khule ḳhaak uḌātī huī āñgan āñgan

raat ke dard kā kar jaatī hai iz.hār havā

chāñd ke ras meñ bujhe lamhoñ kī tanhā.ī meñ

zahr-e-hijrāñ meñ hai Duubī huī talvār havā

kitne lamhe the ki ashkoñ kī tarah barse the

raat guzrī thī jo gaatī huī malhār havā

zard shāḳhoñ kī patāvar meñ uThātī huī hashr

'keats' kī nazm kā jaise koī kirdār havā

vo tirī jhūmtī zulfoñ kā ghanā jañgal hai

bhuul jaatī hai jahāñ shoḳhī-e-raftār havā

āsmāñ par safar-e-mauj-e-sahar se pahle

roz uThā detī hai ik rañg kī dīvār havā

raat ke sans ki mahkar se sarshaar hawa

jagte shahr sula deti hai bedar hawa

ho ke sairab KHam-e-shab se sar-e-daman-e-gul

surat-e-abr baras jati hai mai-KHwar hawa

jaane kis tarah KHalaon mein dhanak banti hai

chand ki rang bhari jhil ke us par hawa

talib-e-mauj-e-sahar jati hai lahron pe sawar

sahil-e-shab se uThati hai jo patwar hawa

kitni yaaden hain ki jhonkon ki tarah tairti hain

chhoD aati hai safar mein jinhen manjdhaar hawa

sar khule KHak uDati hui aangan aangan

raat ke dard ka kar jati hai izhaar hawa

chand ke ras mein bujhe lamhon ki tanhai mein

zahr-e-hijran mein hai Dubi hui talwar hawa

kitne lamhe the ki ashkon ki tarah barse the

raat guzri thi jo gati hui malhaar hawa

zard shaKHon ki patawar mein uThati hui hashr

'keats' ki nazm ka jaise koi kirdar hawa

wo teri jhumti zulfon ka ghana jangal hai

bhul jati hai jahan shoKHi-e-raftar hawa

aasman par safar-e-mauj-e-sahar se pahle

roz uTha deti hai ek rang ki diwar hawa