raat ki basi os paDi thi suraj ke angare par

raat kī baasī os paḌī thī sūraj ke angāre par

dam lene ko utre the ham ik niile sayyāre par

aadhī raat ke sannāTe meñ lashkar saarā ġhāfil thā

tanhā jab sālār girā aur chob paḌī naqqāre par

bhor samay pūrab kī jānib khiḌkī jab khul jā.egī

'ālam saarā raqs karegā qudrat ke ektāre par

vā'da-e-vasl pe 'umr guzārī landan ke mai-ḳhānoñ meñ

agle janm lahore meñ milnā chhajjū ke chaubāre par

ham majnūn farishtoñ kī tarkīb meñ hī betābi hai

pesh-qadam rahte haiñ chāhe jal hī jaa.eñ saare par

ġhaar kī dīvāroñ se le kar bollywōd kī filmoñ tak

mushkī ghoḌe par niklā thā pahuñchā ik tayyāre par

dilkash jismoñ ke bāġhoñ meñ ḳhaak uḌaa.ī jāvegī

kaa.ī jam jā.egī ik din marmar ke favvāre par

vaqt kā ik sailāb-e-ajal hai mauj-e-fanā kī tuġhyānī

kis meñ dam hai ai kaj-fahmo vaqt ke aage maare par

raat ki basi os paDi thi suraj ke angare par

dam lene ko utre the hum ek nile sayyare par

aadhi raat ke sannaTe mein lashkar sara ghafil tha

tanha jab salar gira aur chob paDi naqqare par

bhor samay purab ki jaanib khiDki jab khul jaegi

'alam sara raqs karega qudrat ke ektare par

wa'da-e-wasl pe 'umr guzari landan ke mai-KHanon mein

agle janm lahore mein milna chhajju ke chaubare par

hum majnun farishton ki tarkib mein hi betabi hai

pesh-qadam rahte hain chahe jal hi jaen sare par

ghaar ki diwaron se le kar bollywood ki filmon tak

mushki ghoDe par nikla tha pahuncha ek tayyare par

dilkash jismon ke baghon mein KHak uDai jawegi

kai jam jaegi ek din marmar ke fawware par

waqt ka ek sailab-e-ajal hai mauj-e-fana ki tughyani

kis mein dam hai ai kaj-fahmo waqt ke aage mare par