raat ki sari haqiqat din mein uryan ho gai

raat kī saarī haqīqat din meñ 'uryāñ ho ga.ī

ḳhvāb kī tā'bīr paḌh kar aañkh hairāñ ho ga.ī

har nafs sail-e-havādis har qadam amvāj-e-ġham

zindagī is daur meñ tūfāñ hī tūfāñ ho ga.ī

ārzū-dar-ārzū baḌhtī ga.iiñ mahrūmiyāñ

har tamannā rafta rafta dushman-e-jāñ ho ga.ī

kitnī be-mā'nī rifāqat abr ke TukḌoñ meñ thī

dekh kar mere gharauñde barq-o-bārāñ ho ga.ī

vo tire bachpan kī chingārī bhī thī mausam-shanās

jab javāñ hone ke din aa.e farozāñ ho ga.ī

soz-e-dil dard-e-jigar ḳhūn-e-tamannā ashk-e-ġham

ek laġhzish kitne afsānoñ kā 'unvāñ ho ga.ī

raat ki sari haqiqat din mein 'uryan ho gai

KHwab ki ta'bir paDh kar aankh hairan ho gai

har nafs sail-e-hawadis har qadam amwaj-e-gham

zindagi is daur mein tufan hi tufan ho gai

aarzu-dar-arzu baDhti gain mahrumiyan

har tamanna rafta rafta dushman-e-jaan ho gai

kitni be-ma'ni rifaqat abr ke TukDon mein thi

dekh kar mere gharaunde barq-o-baran ho gai

wo tere bachpan ki chingari bhi thi mausam-shanas

jab jawan hone ke din aae farozan ho gai

soz-e-dil dard-e-jigar KHun-e-tamanna ashk-e-gham

ek laghzish kitne afsanon ka 'unwan ho gai