raat ki zulf kahin ta-ba-kamar khul jae

raat kī zulf kahīñ tā-ba-kamar khul jaa.e

ham pe bhī chāñd sitāroñ kī Dagar khul jaa.e

thak ga.ī niiñd mire ḳhvāb ko Dhote Dhote

kyā ta.ajjub hai mirī aañkh agar khul jaa.e

merā sarmāya mire paaoñ ke chhāloñ kī tapak

rāste meñ hī na sab zād-e-safar khul jaa.e

aaj dariyā nahīñ kuuze meñ samāne vaalā

vaqt hai mujh pe mirā zo.am-e-hunar khul jaa.e

sab musāfir haiñ na.ī raah kī sab ko hai talāsh

sab pe mumkin to nahīñ rāh-e-digar khul jaa.e

apnī tanhā.ī meñ mahbūs huuñ muddat se 'nadīm'

tū agar saath ho dīvār meñ dar khul jaa.e

raat ki zulf kahin ta-ba-kamar khul jae

hum pe bhi chand sitaron ki Dagar khul jae

thak gai nind mere KHwab ko Dhote Dhote

kya tajjub hai meri aankh agar khul jae

mera sarmaya mere paon ke chhaalon ki tapak

raste mein hi na sab zad-e-safar khul jae

aaj dariya nahin kuze mein samane wala

waqt hai mujh pe mera zoam-e-hunar khul jae

sab musafir hain nai rah ki sab ko hai talash

sab pe mumkin to nahin rah-e-digar khul jae

apni tanhai mein mahbus hun muddat se 'nadim'

tu agar sath ho diwar mein dar khul jae