رات کیوں مختصر نہیں ہوتی

رات کیوں مختصر نہیں ہوتی

ہجر کی کیوں سحر نہیں ہوتی

جو گزرتی ہے ہجر میں مجھ پر

کیا انہیں کچھ خبر نہیں ہوتی

زندگی کیوں وبال ہے یارو

چین سے کیوں بسر نہیں ہوتی

حسرتیں دل میں ہیں بہت لیکن

کوئی بھی بار ور نہیں ہوتی

لاگ سے جو پڑے کسی شے پر

وہ نظر بے اثر نہیں ہوتی

کب کیا ہے اسے نظر انداز

اس کو یہ کیوں خبر نہیں ہوتی

کچھ دعا میں اثر نہ ہو تو نہ ہو

بد دعا بے اثر نہیں ہوتی

خالق جزو و کل ادھر بھی دیکھ

کیوں توجہ ادھر نہیں ہوتی

تم سے آشفتہ سر کی اے خاورؔ

بات کچھ معتبر نہیں ہوتی