raat ne apni rakh uThai din rakkha darwaze par

raat ne apnī raakh uThā.ī din rakkhā darvāze par

jamne lagī thiiñ kohr meñ aaheñ kaun rukā darvāze par

arboñ logoñ tak jaanā thā sab kā hissa pahuñchānā thā

būḌhā din bhī ḳhuub thakā to aan girā darvāze par

do āñkheñ aur ḳhvāb hazāroñ resham ke juzdānoñ meñ

kaun musāfir apnā sāmāñ chhoḌ gayā darvāze par

nam āñkhoñ se jaane vaalā kaisā va.ada sauñp gayā

ek yaqīñ kā biij girā aur peḌ ugā darvāze par

galī kī kachchī barf pe kis ke pairoñ kā hai taaza naqsh

be-dastak jo lauT gayā kaun aaya thā darvāze par

us ik raḳht-e-safar kī ḳhushbū saare safar meñ saath rahī

us ne chalte vaqt jo haat pe bosa diyā darvāze par

kabhī na aane vaale ek musāfir ke imkān andar

shab-bhar bell par kaan rahe aur dhyān rahā darvāze par

raat ne apni rakh uThai din rakkha darwaze par

jamne lagi thin kohr mein aahen kaun ruka darwaze par

arbon logon tak jaana tha sab ka hissa pahunchana tha

buDha din bhi KHub thaka to aan gira darwaze par

do aankhen aur KHwab hazaron resham ke juzdanon mein

kaun musafir apna saman chhoD gaya darwaze par

nam aankhon se jaane wala kaisa wada saunp gaya

ek yaqin ka bij gira aur peD uga darwaze par

gali ki kachchi barf pe kis ke pairon ka hai taza naqsh

be-dastak jo lauT gaya kaun aaya tha darwaze par

us ek raKHt-e-safar ki KHushbu sare safar mein sath rahi

us ne chalte waqt jo hat pe bosa diya darwaze par

kabhi na aane wale ek musafir ke imkan andar

shab-bhar bell par kan rahe aur dhyan raha darwaze par