رات روشن تھی مگر ہجر کی ماری نکلی

رات روشن تھی مگر ہجر کی ماری نکلی

پھر سر دشت طلب تیری سواری نکلی

تھا ہی کیا اپنا جسے اپنا بنائے رکھتے

جان سی چیز تھی وہ بھی تو تمہاری نکلی

مختصر کار جنوں ہم سے ہوا تھا سرزد

دفتر عشق میں تفصیل ہماری نکلی

میں کسی اور جہان خس و خاشاک میں تھا

اور کہیں اس گل خوبی کی سواری نکلی

رائیگانی کا عجب رنگ کھلا ہے مجھ پر

ریگ مقتل بھی مرے خون سے عاری نکلی

میں سیہ بخت سوالی نہیں تنہا تیرا

چاندنی بھی تو ترے در کی بھکاری نکلی