raat tanhai mein bula ke mujhe

raat tanhā.ī meñ bulā ke mujhe

ḳhuub royā gale lagā ke mujhe

saare din kī takān jaatī rahī

us ne dekhā jo muskurā ke mujhe

terī āñkhoñ meñ kis kī hai ye chamak

kaun raushan huā bujhā ke mujhe

ab mirā phone bhī uThātā nahīñ

jis ne māñgā thā haath uThā ke mujhe

din-ba-din aur qarīb kartā gayā

dekhnā us kā duur jā ke mujhe

maiñ bhī dānista haar jaatā huuñ

vo jo ḳhush hotā hai harā ke mujhe

hādsoñ se huuñ is qadar mānūs

ab Darāte nahīñ dhamāke mujhe

terī āġhosh meñ vo yaad aayā

aur phir le gayā bahā ke mujhe

merā ġhussa vo hañs ke piitī rahī

taur sikhlā ga.ī vafā ke mujhe

phir nayā 'ishq ho chalā hai 'nūr'

ab ke chalnā hai bach-bachā ke mujhe

raat tanhai mein bula ke mujhe

KHub roya gale laga ke mujhe

sare din ki takan jati rahi

us ne dekha jo muskura ke mujhe

teri aankhon mein kis ki hai ye chamak

kaun raushan hua bujha ke mujhe

ab mera phone bhi uThata nahin

jis ne manga tha hath uTha ke mujhe

din-ba-din aur qarib karta gaya

dekhna us ka dur ja ke mujhe

main bhi danista haar jata hun

wo jo KHush hota hai hara ke mujhe

hadson se hun is qadar manus

ab Daraate nahin dhamake mujhe

teri aaghosh mein wo yaad aaya

aur phir le gaya baha ke mujhe

mera ghussa wo hans ke piti rahi

taur sikhla gai wafa ke mujhe

phir naya 'ishq ho chala hai 'nur'

ab ke chalna hai bach-bacha ke mujhe