raaz aashkara hai ab gham-e-nihan apna

raaz āshkārā hai ab ġham-e-nihāñ apnā

aah ye sukūt āḳhir ban gayā bayāñ apnā

husn aur ġham-ḳhvārī ḳhvāb hai ki bedārī

hai hanūz kuchh baaqī shāyad imtihāñ apnā

kab huī talāsh un ko kho ga.e jab aise ham

ḳhud hameñ nahīñ miltā naam ko nishāñ apnā

lutf-e-zindagī kaisā sair-e-gulsitāñ kaisī

hai vo ab qafas apnā thā jo āshiyāñ apnā

ārzūeñ ghuT ghuT kar dil hī meñ raheñ kab tak

luuT le koī rahzan kaash kārvāñ apnā

aa na jaa.e harf ik din un kī be-niyāzī par

tā-kujā mohabbat meñ aap imtihāñ apnā

dil kī baat kī jaa.e kis se phir sivā.e dil

jab nahīñ yahāñ 'kaukab' koī rāz-dāñ apnā

raaz aashkara hai ab gham-e-nihan apna

aah ye sukut aaKHir ban gaya bayan apna

husn aur gham-KHwari KHwab hai ki bedari

hai hanuz kuchh baqi shayad imtihan apna

kab hui talash un ko kho gae jab aise hum

KHud hamein nahin milta nam ko nishan apna

lutf-e-zindagi kaisa sair-e-gulsitan kaisi

hai wo ab qafas apna tha jo aashiyan apna

aarzuen ghuT ghuT kar dil hi mein rahen kab tak

luT le koi rahzan kash karwan apna

aa na jae harf ek din un ki be-niyazi par

ta-kuja mohabbat mein aap imtihan apna

dil ki baat ki jae kis se phir siwae dil

jab nahin yahan 'kaukab' koi raaz-dan apna