raaz ashkon ka chhupaun to chhupa bhi na sakun

raaz ashkoñ kā chhupā.ūñ to chhupā bhī na sakūñ

aur jalte hue dāman ko bachā bhī na sakūñ

jaane kyā ġhair kī mahfil meñ hai sāmān-e-nashāt

dil-o-jāñ de ke jo tere liye lā bhī na sakūñ

ai mire azm-e-safar kyā tujhe maut aa.ī hai

shahr-e-qātil meñ na rah pā.ūñ to jā bhī na sakūñ

shauq-e-bebāk ne sochā na thā sajdoñ kā ma.aal

ġhairat-e-vaz.a se ab sar ko uThā bhī na sakūñ

terī baḳhshish kā ye andāz hai kyā ai saaqī

be-piye bhī na bane jaam uThā bhī na sakūñ

dast-e-mahbūb pe bhī rang-e-hinā baar huā

ḳhaak meñ ḳhūn-e-tamannā ko milā bhī na sakūñ

kahnā ḳhāmoshī-e-sahrā se ye 'jauhar' kā payām

aisā majbūr nahīñ huuñ ki phir aa bhī na sakūñ

raaz ashkon ka chhupaun to chhupa bhi na sakun

aur jalte hue daman ko bacha bhi na sakun

jaane kya ghair ki mahfil mein hai saman-e-nashat

dil-o-jaan de ke jo tere liye la bhi na sakun

ai mere azm-e-safar kya tujhe maut aai hai

shahr-e-qatil mein na rah paun to ja bhi na sakun

shauq-e-bebak ne socha na tha sajdon ka maal

ghairat-e-waza se ab sar ko uTha bhi na sakun

teri baKHshish ka ye andaz hai kya ai saqi

be-piye bhi na bane jam uTha bhi na sakun

dast-e-mahbub pe bhi rang-e-hina bar hua

KHak mein KHun-e-tamanna ko mila bhi na sakun

kahna KHamoshi-e-sahra se ye 'jauhar' ka payam

aisa majbur nahin hun ki phir aa bhi na sakun