راز در پردۂ دستار و قبا جانتی ہے

راز در پردۂ دستار و قبا جانتی ہے

کون کس بھیس میں ہے خلق خدا جانتی ہے

کون سے دیپ نمائش کے لئے چھوڑنے ہیں

کن چراغوں کو بجھانا ہے ہوا جانتی ہے

یہ کبھی مجھ کو اکیلا نہیں ہونے دیتی

میری تنہائی مجھے تم سے سوا جانتی ہے

آپ ایجاد کریں جور و ستم روز نئے

بھول جانے کا ہنر میری وفا جانتی ہے

نشۂ عشق مجھے اور ذرا کر مدہوش

بے خودی میری ابھی میرا پتہ جانتی ہے

دشت منظور ہے لیکن مجھے منظور نہیں

ایسی بستی جو شرافت کو خطا جانتی ہے

کون سے بت ہیں جنہیں دست پیمبر توڑے

امت حرص تو پیسے کو خدا جانتی ہے

نسبتیں لاکھ بدل ڈالے زمانہ لیکن

ایک دنیا تو مجھے اب بھی ترا جانتی ہے

اک مری چشم تماشا ہے کہ ہوتی نہیں سیر

فکر منزل ہے کہ رکنے کو برا جانتی ہے

میرے الفاظ ہیں دراصل قلم کے آنسو

روشنائی لہو بننے کی ادا جانتی ہے