raaz dar-parda-e-dastar-o-qaba jaanti hai

raaz dar-parda-e-dastār-o-qabā jāntī hai

kaun kis bhes meñ hai ḳhalq-e-ḳhudā jāntī hai

kaun se diip numā.ish ke liye chhoḌne haiñ

kin charāġhoñ ko bujhānā hai havā jāntī hai

ye kabhī mujh ko akelā nahīñ hone detī

merī tanhā.ī mujhe tum se sivā jāntī hai

aap ījād kareñ jaur-o-sitam roz na.e

bhuul jaane kā hunar merī vafā jāntī hai

nashsha-e-‘ishq mujhe aur zarā kar mad.hosh

be-ḳhudī merī abhī merā pata jāntī hai

dasht manzūr hai lekin mujhe manzūr nahīñ

aisī bastī jo sharāfat ko ḳhatā jāntī hai

kaun se but haiñ jinheñ dast-e-payambar toḌe

ummat-e-hirs to paise ko ḳhudā jāntī hai

nisbateñ laakh badal Daale zamāna lekin

ek duniyā to mujhe ab bhī tirā jāntī hai

ik mirī chashm-e-tamāshā hai ki hotī nahīñ sair

fikr-e-manzil hai ki rukne ko burā jāntī hai

mere alfāz haiñ dar-asl qalam ke aañsū

raushnā.ī lahū banñe kī adā jāntī hai

raaz dar-parda-e-dastar-o-qaba jaanti hai

kaun kis bhes mein hai KHalq-e-KHuda jaanti hai

kaun se dip numaish ke liye chhoDne hain

kin charaghon ko bujhana hai hawa jaanti hai

ye kabhi mujh ko akela nahin hone deti

meri tanhai mujhe tum se siwa jaanti hai

aap ijad karen jaur-o-sitam roz nae

bhul jaane ka hunar meri wafa jaanti hai

nashsha-e-‘ishq mujhe aur zara kar madhosh

be-KHudi meri abhi mera pata jaanti hai

dasht manzur hai lekin mujhe manzur nahin

aisi basti jo sharafat ko KHata jaanti hai

kaun se but hain jinhen dast-e-payambar toDe

ummat-e-hirs to paise ko KHuda jaanti hai

nisbaten lakh badal Dale zamana lekin

ek duniya to mujhe ab bhi tera jaanti hai

ek meri chashm-e-tamasha hai ki hoti nahin sair

fikr-e-manzil hai ki rukne ko bura jaanti hai

mere alfaz hain dar-asl qalam ke aansu

raushnai lahu banne ki ada jaanti hai