raaz-e-alam se hai shayad ki mera raaz juda

rāz-e-alam se hai shāyad ki mirā raaz judā

mujh se milne meñ hai us aañkh kā andāz judā

koī aisī nafsoñ se bhī ho dam-sāz judā

dil kā andāz judā saaz judā raaz judā

bad-gumāñ 'ishq ko sad vahm-o-yaqīñ ke khaTke

shoḳhī-e-chashm suḳhan-sāz hai ġhammāz judā

yuuñ hī kyā kam hai tirī yaad ki dil ko chheḌeñ

zulf-e-pur-ḳham lab-e-rañgīñ nigah-e-nāz judā

uqda-e-pech-o-ḳham-e-zulf kā khulnā mā'lūm

rāz-e-alam se hai ye silsila-e-rāz judā

tañgī-o-vus.at-e-kaunain meñ nisbat kaisī

dar-e-tauba se dar-e-mai-kadā ho baaz judā

āh-o-zārī se kabhī sāz-e-mohabbat na chhuḌā

ġham kā andāz judā 'ishq kā andāz judā

husn kī shaah talavvun udhar ik āfat-e-jān

vāhime dil ke udhar tafarqe parvāz judā

barq-e-āvāz jalā de ye niyastān-e-jahāñ

sāz-e-hastī se hai sāz-e-lab-e-e.ajāz judā

baḌhte bhī jaate haiñ sab ahl-e-jahāñ sū-e-adam

umr-e-rafta bhī diye jaatī hai āvāz judā

pai-ba-pai uḌte hue hosh ke andāz alag

tarz-e-barq-e-nigah-e-husn-e-junūñ-sāz judā

nigah-e-nāz diye jaatī hai paiġhām-e-hayāt

maut se khel rahe haiñ tire jāñbāz judā

kuchh ishāre haiñ udhar shoḳhī pinhāñ ke 'firāq'

hai sukūt-e-nigah-e-nāz suḳhan-sāz judā

raaz-e-alam se hai shayad ki mera raaz juda

mujh se milne mein hai us aankh ka andaz juda

koi aisi nafson se bhi ho dam-saz juda

dil ka andaz juda saz juda raaz juda

bad-guman 'ishq ko sad wahm-o-yaqin ke khaTke

shoKHi-e-chashm suKHan-saz hai ghammaz juda

yun hi kya kam hai teri yaad ki dil ko chheDen

zulf-e-pur-KHam lab-e-rangin nigah-e-naz juda

uqda-e-pech-o-KHam-e-zulf ka khulna ma'lum

raaz-e-alam se hai ye silsila-e-raaz juda

tangi-o-wusat-e-kaunain mein nisbat kaisi

dar-e-tauba se dar-e-mai-kada ho baz juda

aah-o-zari se kabhi saz-e-mohabbat na chhuDa

gham ka andaz juda 'ishq ka andaz juda

husn ki shah talawwun udhar ek aafat-e-jaan

wahime dil ke udhar tafarqe parwaz juda

barq-e-awaz jala de ye niyastan-e-jahan

saz-e-hasti se hai saz-e-lab-e-eajaz juda

baDhte bhi jate hain sab ahl-e-jahan su-e-adam

umr-e-rafta bhi diye jati hai aawaz juda

pai-ba-pai uDte hue hosh ke andaz alag

tarz-e-barq-e-nigah-e-husn-e-junun-saz juda

nigah-e-naz diye jati hai paigham-e-hayat

maut se khel rahe hain tere jaanbaz juda

kuchh ishaare hain udhar shoKHi pinhan ke 'firaq'

hai sukut-e-nigah-e-naz suKHan-saz juda