raaz-e-giraftagi na asir-e-lahn se puchh

rāz-e-giraftagī na asīr-e-lahn se pūchh

ye baat apnī zulf-e-shikan-dar-shikan se pūchh

āvārgī ke lutf na sarv-o-saman se pūchh

vahshat meñ kyā mazā hai havā-e-chaman se pūchh

mardān-e-haq kā azm shahīdān-e-haq kā jurm

dil-dādgān-e-sheva-e-dār-o-rasan se pūchh

kyā shām-e-ġham meñ dīda-o-dil par guzar ga.ī

un taaza vārdān-e-bisāt-e-kuhan se pūchh

lazzat-kashān-e-sāġhar-e-ishrat ko kyā ḳhabar

ranj-e-ḳhumār talḳhī-e-kām-o-dahan se pūchh

sahn-e-chaman meñ lāla-o-gul par tire baġhair

kyā kyā guzar rahī hai bahār-e-chaman se pūchh

āġhāz-e-irtibāt-o-ta.alluq ke vāqi.āt

kuchh apne hosh kuchh mire dīvāna-pan se pūchh

ai fasl-e-gul mizāj jarāhat-rasīdgāñ

gar ho sake to lāla-e-ḳhūnīñ kafan se pūchh

jo terī mashq-e-nāz se pāmāl ho gayā

apnā mizāj-e-nāz usī ḳhasta-tan se pūchh

afsāna-e-bahār asīr-e-qafas se sun

yād-e-vatan kā lutf kisī be-vatan se pūchh

ai dost ham se kufr-e-mohabbat kā dars le

asrār-e-kāfirī na but-e-barhaman se pūchh

ham bhī kabhī the anjuman-ārā-e-ārzū

us jān-e-bazm-o-zeb-dah-e-anjuman se pūchh

ham bhī kabhī the yūsuf-e-kan.ān-e-rañg-o-bū

pīr-e-za.īf-o-pīr zan-o-pairhan se pūchh

raaz-e-giraftagi na asir-e-lahn se puchh

ye baat apni zulf-e-shikan-dar-shikan se puchh

aawargi ke lutf na sarw-o-saman se puchh

wahshat mein kya maza hai hawa-e-chaman se puchh

mardan-e-haq ka azm shahidan-e-haq ka jurm

dil-dadgan-e-shewa-e-dar-o-rasan se puchh

kya sham-e-gham mein dida-o-dil par guzar gai

un taza wardan-e-bisat-e-kuhan se puchh

lazzat-kashan-e-saghar-e-ishrat ko kya KHabar

ranj-e-KHumar talKHi-e-kaam-o-dahan se puchh

sahn-e-chaman mein lala-o-gul par tere baghair

kya kya guzar rahi hai bahaar-e-chaman se puchh

aaghaz-e-irtibaat-o-talluq ke waqiat

kuchh apne hosh kuchh mere diwana-pan se puchh

ai fasl-e-gul mizaj jarahat-rasidgan

gar ho sake to lala-e-KHunin kafan se puchh

jo teri mashq-e-naz se pamal ho gaya

apna mizaj-e-naz usi KHasta-tan se puchh

afsana-e-bahaar asir-e-qafas se sun

yaad-e-watan ka lutf kisi be-watan se puchh

ai dost hum se kufr-e-mohabbat ka dars le

asrar-e-kafiri na but-e-barhaman se puchh

hum bhi kabhi the anjuman-ara-e-arzu

us jaan-e-bazm-o-zeb-dah-e-anjuman se puchh

hum bhi kabhi the yusuf-e-kanan-e-rang-o-bu

pir-e-zaif-o-pir zan-o-pairhan se puchh