raaz-e-maKHfi tumne mera ghair se ifsha kiya

rāz-e-maḳhfī tum ne merā ġhair se ifshā kiyā

ḳhair behtar mujh ko rusvā kar diyā achchhā kiyā

kaun kahtā hai kahe tū aa ke mere sāmne

kis ghaḌī kis vaqt maiñ ne aap kā shikvā kiyā

pūchhiye mujh se na apnī bazm-e-ishrat-zā kā haal

aap to hañste rahe ġhairoñ se maiñ royā kiyā

āb-e-shamshīr-e-do-dam se zaḳhm-e-dāman-dār ke

be-takalluf phuul apne jism par pahnā kiyā

jo kahā tum ne tamanna se bajā laayā use

kab nahīñ maiñ ne tumhārā ai sanam kahnā kiyā

le liyā sote meñ bosa us but-e-chālāk kā

ai dil-e-gustāḳh tū ne kaam ye bejā kiyā

ḳhāksār-e-ishq-e-sādiq thā zamīn-e-dahr meñ

der tak misl-e-urūs-e-nau vo sharmāyā kiyā

ik but-e-nā-āshnā se āshnā kar ke mujhe

hazrat-e-dil aap ne kis kis tarah rusvā kiyā

dam hamārā kyā koī thā va.ada-e-vasl-e-habīb

sub.h se tā-shām roz-e-hijr meñ TuuTā kiyā

zer-e-ḳhanjar ḳhāna-e-maqtal meñ vaqt-e-qatl maiñ

chehra-e-qātil ko chashm-e-zaḳhm se dekhā kiyā

hijr jaanā maiñ samajh kar shāhid-e-pinhāñ use

muddatoñ dard-e-jigar se dil ko bahlāyā kiyā

hazrat-e-dil ik but-e-be-rahm par maftūñ hue

baiThe-biThlā.e shagūfa aur ye paidā kiyā

marhabā sad-marhabā ai sarsar-e-āh-o-fuġhāñ

āḳhirash tū ne charāġh-e-zindagī ThanDā kiyā

ai shagufta ham ne ro ro kar ḳhayāl-e-yār meñ

ashk-e-chashm-e-tar se paidā dam-ba-dam dariyā kiyā

raaz-e-maKHfi tum ne mera ghair se ifsha kiya

KHair behtar mujh ko ruswa kar diya achchha kiya

kaun kahta hai kahe tu aa ke mere samne

kis ghaDi kis waqt main ne aap ka shikwa kiya

puchhiye mujh se na apni bazm-e-ishrat-za ka haal

aap to hanste rahe ghairon se main roya kiya

aab-e-shamshir-e-do-dam se zaKHm-e-daman-dar ke

be-takalluf phul apne jism par pahna kiya

jo kaha tum ne tamanna se baja laya use

kab nahin main ne tumhaara ai sanam kahna kiya

le liya sote mein bosa us but-e-chaalak ka

ai dil-e-gustaKH tu ne kaam ye beja kiya

KHaksar-e-ishq-e-sadiq tha zamin-e-dahr mein

der tak misl-e-urus-e-nau wo sharmaya kiya

ek but-e-na-ashna se aashna kar ke mujhe

hazrat-e-dil aap ne kis kis tarah ruswa kiya

dam hamara kya koi tha wada-e-wasl-e-habib

subh se ta-sham roz-e-hijr mein TuTa kiya

zer-e-KHanjar KHana-e-maqtal mein waqt-e-qatl main

chehra-e-qatil ko chashm-e-zaKHm se dekha kiya

hijr jaana main samajh kar shahid-e-pinhan use

muddaton dard-e-jigar se dil ko bahlaya kiya

hazrat-e-dil ek but-e-be-rahm par maftun hue

baiThe-biThlae shagufa aur ye paida kiya

marhaba sad-marhaba ai sarsar-e-ah-o-fughan

aaKHirash tu ne charagh-e-zindagi ThanDa kiya

ai shagufta hum ne ro ro kar KHayal-e-yar mein

ashk-e-chashm-e-tar se paida dam-ba-dam dariya kiya