raaz-e-tauhid to kasrat mein chhupa hai ai dost

rāz-e-tauhīd to kasrat meñ chhupā hai ai dost

saikḌoñ jalve haiñ ik jalva-numā hai ai dost

ik zamāna yahāñ dīvāna banā hai ai dost

tere kūche kī havā hosh-rubā hai ai dost

ishrat-e-hāsil-e-isyāñ meñ kahāñ vo lazzat

ba-ḳhudā tark-e-gunah meñ jo mazā hai ai dost

surma-e-tūr ho yā ḳhāk-e-shifā yā iksīr

sab se baḌh kar tirī ḳhāk-e-kaf-e-pā hai ai dost

kyā kareñ jaan na de deñ jo mohabbat vaale

har adā husn kī paiġhām-e-qazā hai ai dost

tū ne kis aisī nigāhoñ se azal meñ dekhā

aaj tak ḳhauf se dil kaañp rahā hai ai dost

qā.il-e-hashr-o-qayāmat to sabhī haiñ lekin

tere va.ade kā yaqīñ kis ko huā hai ai dost

jāntā kaun nahīñ ahd-e-vafā ko tere

vo bhī minjumla-e-andāz-e-jafā hai ai dost

us zamīñ par kiyā karte haiñ farishte sajde

tere kushtoñ kā jahāñ ḳhuun bahā hai ai dost

ġham tire jalvoñ meñ ho jaatī haiñ nazreñ un kī

dekhne vāloñ se tere ye sunā hai ai dost

tāj-e-ḳhusrav se ġharaz us ko na taḳht-e-jam se

'afqar'-e-ḳhāk-nashīñ terā gadā hai ai dost

raaz-e-tauhid to kasrat mein chhupa hai ai dost

saikDon jalwe hain ek jalwa-numa hai ai dost

ek zamana yahan diwana bana hai ai dost

tere kuche ki hawa hosh-ruba hai ai dost

ishrat-e-hasil-e-isyan mein kahan wo lazzat

ba-KHuda tark-e-gunah mein jo maza hai ai dost

surma-e-tur ho ya KHak-e-shifa ya iksir

sab se baDh kar teri KHak-e-kaf-e-pa hai ai dost

kya karen jaan na de den jo mohabbat wale

har ada husn ki paigham-e-qaza hai ai dost

tu ne kis aisi nigahon se azal mein dekha

aaj tak KHauf se dil kanp raha hai ai dost

qail-e-hashr-o-qayamat to sabhi hain lekin

tere wade ka yaqin kis ko hua hai ai dost

jaanta kaun nahin ahd-e-wafa ko tere

wo bhi minjumla-e-andaz-e-jafa hai ai dost

us zamin par kiya karte hain farishte sajde

tere kushton ka jahan KHun baha hai ai dost

gham tere jalwon mein ho jati hain nazren un ki

dekhne walon se tere ye suna hai ai dost

taj-e-KHusraw se gharaz us ko na taKHt-e-jam se

'afqar'-e-KHak-nashin tera gada hai ai dost