راز الفت دل میں رکھا کیجئے

راز الفت دل میں رکھا کیجئے

عشق کو ہرگز نہ رسوا کیجئے

کون ہے اپنا پرایا کون ہے

کم سے کم اتنا تو سمجھا کیجئے

روٹھئے گا تو منا لیں گے مگر

میری مجبوری بھی سمجھا کیجئے

چند روزہ زندگانی کے لئے

ذہن کا دل کا نہ سودا کیجئے

میں ہوں اپنے آپ میں الجھا ہوا

ناصحو مجھ سے نہ الجھا کیجئے

چاہتے ہیں آپ اگر امن و اماں

اک نظر سے سب کو دیکھا کیجئے

زندگی کا ہے یہی مقصد کہ آپ

حق کو اس دنیا میں برپا کیجئے

اے صداؔ گرد کدورت سے کبھی

دل کا آئینہ نہ میلا کیجئے