raaz mein rakh teri ruswai ka qissa main hun

raaz meñ rakh tirī rusvā.ī kā qissa maiñ huuñ

mujh ko pahchān tirā dūsrā chehra maiñ huuñ

dafn haiñ tere ka.ī raaz mire siine meñ

jo tire ghar se guzartā hai vo rasta maiñ huuñ

muddatoñ baa'd bhī jaarī hai azāboñ kā safar

qatra qatra tirī āñkhoñ se Tapaktā maiñ huuñ

aa zarā baiTh mire paas bhī kuchh pul ke liye

mere hamdam tirī dīvār kā saaya maiñ huuñ

ab bhī zinda huuñ tirī ruuh meñ ġham kī sūrat

kaun kahtā hai ki TuuTā huā rishta maiñ huuñ

mujh ko pūjegī tah-e-ḳhāk jo duniyā hai 'shakīl'

kal jo TuuTā thā falak se vo sitāra maiñ huuñ

raaz mein rakh teri ruswai ka qissa main hun

mujh ko pahchan tera dusra chehra main hun

dafn hain tere kai raaz mere sine mein

jo tere ghar se guzarta hai wo rasta main hun

muddaton ba'd bhi jari hai azabon ka safar

qatra qatra teri aankhon se Tapakta main hun

aa zara baiTh mere pas bhi kuchh pul ke liye

mere hamdam teri diwar ka saya main hun

ab bhi zinda hun teri ruh mein gham ki surat

kaun kahta hai ki TuTa hua rishta main hun

mujh ko pujegi tah-e-KHak jo duniya hai 'shakil'

kal jo TuTa tha falak se wo sitara main hun