raaz-o-niyaz-e-ishq ke qabil bana diya

rāz-o-niyāz-e-ishq ke qābil banā diyā

un kī nazar ne dil ko mire dil banā diyā

is malgaje libās pe ārā.isheñ nisār

tum ne to sādgī ko bhī qātil banā diyā

barq-o-sharar ko de ke tapish aur iztirāb

jo bach rahā usī ko mirā dil banā diyā

chāragarī ne aap kī chhū kar nigāh se

har aable ko dard bharā dil banā diyā

ab in tajalliyoñ kā ho kis taur se nufūz

jin ko hayā ne parda-e-hā.il banā diyā

dil ek musht-e-ḳhāk thā terī nigāh ne

miTTī ko soz-e-ishq ke qābil banā diyā

tere zuhūr-e-husn ne tahlīl-e-nūr kī

ajzā-e-muntashir ko mirā dil banā diyā

āġhāz-e-rabt meñ nigah-e-jāñ-navāz ne

dil ko tirī umiid ke qābil banā diyā

āñkhoñ ko intizār kī bedāriyāñ milīñ

soz-e-nafas ko garmī-e-mahfil banā diyā

fitrat ko hai gila ki mire iztirāb ne

hāsil ko barq barq ko hāsil banā diyā

jab shauq tāza-dam thā to manzil bhī raah thī

jab thak ga.e to raah ko manzil banā diyā

'safdar' ye un kī fitna-ḳhirāmī ko dekhiye

phūloñ pe paañv rakh ke unheñ dil banā diyā

raaz-o-niyaz-e-ishq ke qabil bana diya

un ki nazar ne dil ko mere dil bana diya

is malgaje libas pe aaraishen nisar

tum ne to sadgi ko bhi qatil bana diya

barq-o-sharar ko de ke tapish aur iztirab

jo bach raha usi ko mera dil bana diya

chaaragari ne aap ki chhu kar nigah se

har aable ko dard bhara dil bana diya

ab in tajalliyon ka ho kis taur se nufuz

jin ko haya ne parda-e-hail bana diya

dil ek musht-e-KHak tha teri nigah ne

miTTi ko soz-e-ishq ke qabil bana diya

tere zuhur-e-husn ne tahlil-e-nur ki

ajza-e-muntashir ko mera dil bana diya

aaghaz-e-rabt mein nigah-e-jaan-nawaz ne

dil ko teri umid ke qabil bana diya

aankhon ko intizar ki bedariyan milin

soz-e-nafas ko garmi-e-mahfil bana diya

fitrat ko hai gila ki mere iztirab ne

hasil ko barq barq ko hasil bana diya

jab shauq taza-dam tha to manzil bhi rah thi

jab thak gae to rah ko manzil bana diya

'safdar' ye un ki fitna-KHirami ko dekhiye

phulon pe panw rakh ke unhen dil bana diya