rabab-e-dil ka har ek tar chhin lo mujhse

rabāb-e-dil kā har ik taar chhīn lo mujh se

jo ho sake to mirā pyaar chhīn lo mujh se

ummīd-o-hasrat-o-armān-o-yās-o-rañj-o-alam

yahī haiñ mere madad-gār chhīn lo mujh se

qadam milā ke chalo rāh-e-ishq meñ varna

mirā chalan mirī raftār chhīn lo mujh se

mujhe nahīñ hai gavārā navāzish-e-bejā

mirī mohabbat-e-ḳhuddār chhīn lo mujh se

tumheñ qasam hai masīhā bajā.e jāñ-baḳhshī

mirī hayāt-e-dil-āzār chhīn lo mujh se

tum apne lab ke liye mere zaḳhm-e-dil kī hañsī

ḳhushī se ai mire sarkār chhīn lo mujh se

agar jahāñ meñ ye aalam hai sard-mehrī kā

to merī garmī-e-guftār chhīn lo mujh se

tumhāre dil meñ bhī ghar kar chuke hoñ chupke se

to aao 'sāz' ke ash.ār chhīn lo mujh se

rabab-e-dil ka har ek tar chhin lo mujh se

jo ho sake to mera pyar chhin lo mujh se

ummid-o-hasrat-o-arman-o-yas-o-ranj-o-alam

yahi hain mere madad-gar chhin lo mujh se

qadam mila ke chalo rah-e-ishq mein warna

mera chalan meri raftar chhin lo mujh se

mujhe nahin hai gawara nawazish-e-beja

meri mohabbat-e-KHuddar chhin lo mujh se

tumhein qasam hai masiha bajae jaan-baKHshi

meri hayat-e-dil-azar chhin lo mujh se

tum apne lab ke liye mere zaKHm-e-dil ki hansi

KHushi se ai mere sarkar chhin lo mujh se

agar jahan mein ye aalam hai sard-mehri ka

to meri garmi-e-guftar chhin lo mujh se

tumhaare dil mein bhi ghar kar chuke hon chupke se

to aao 'saz' ke ashaar chhin lo mujh se