rabab-e-husn hai ya koi saz-e-ulfat hai

rabāb-e-husn hai yā koī sāz-e-ulfat hai

samajh meñ aa na sakī dil kī jo haqīqat hai

kudūratoñ se ye ahl-e-jahāñ kī hālat hai

na ab diloñ meñ safā.ī na rasm-e-ulfat hai

marīz-e-hijr kī ab kuchh ajiib hālat hai

na hosh hī meñ hai apne na ḳhvāb-e-ġhaflat hai

bane jo aur bigaḌ jaa.e hai mirī taqdīr

bigaḌ bigaḌ ke bane jo adū kī qismat hai

qadam qadam pe haiñ sahrā ke ḳhaar dāman-gīr

vafā kī raah meñ har-gām par musībat hai

zabāñ khulegī na mahshar meñ sāmne un ke

kare jo hashr meñ fariyād kis kī jur.at hai

guloñ kā khul ke bikharnā hai aa.ina ġham kā

chaman kā yuuñ to har ik patta naqsh-e-ibrat hai

bikhar rahā hai kitāb-e-jahāñ kā shīrāza

qayāmat aane se pahle ye kyā qayāmat hai

simaT ke aa ga.ī pahlū meñ kā.enāt-e-jahāñ

samajh meñ aa nahīñ saktī jo dil kī vus.at hai

ye zauq-e-sher-o-suḳhan fitratan hai ai 'sho.ala'

numūd-o-nām kī ḳhvāhish na fikr-e-shohrat hai

rabab-e-husn hai ya koi saz-e-ulfat hai

samajh mein aa na saki dil ki jo haqiqat hai

kuduraton se ye ahl-e-jahan ki haalat hai

na ab dilon mein safai na rasm-e-ulfat hai

mariz-e-hijr ki ab kuchh ajib haalat hai

na hosh hi mein hai apne na KHwab-e-ghaflat hai

bane jo aur bigaD jae hai meri taqdir

bigaD bigaD ke bane jo adu ki qismat hai

qadam qadam pe hain sahra ke KHar daman-gir

wafa ki rah mein har-gam par musibat hai

zaban khulegi na mahshar mein samne un ke

kare jo hashr mein fariyaad kis ki jurat hai

gulon ka khul ke bikharna hai aaina gham ka

chaman ka yun to har ek patta naqsh-e-ibrat hai

bikhar raha hai kitab-e-jahan ka shiraaza

qayamat aane se pahle ye kya qayamat hai

simaT ke aa gai pahlu mein kaenat-e-jahan

samajh mein aa nahin sakti jo dil ki wusat hai

ye zauq-e-sher-o-suKHan fitratan hai ai 'shoala'

numud-o-nam ki KHwahish na fikr-e-shohrat hai